Ўзбекистон Бутунжаҳон кўчманчи халқлар ўйинларида илк медалларни қўлга киритди

1—9 сентябрь кунлари Қирғизистоннинг Чўлпон ота шаҳрида Бутунжаҳон кўчманчи халқлар ўйинлари бўлиб ўтмоқда. Бу ҳақда ЎзА хабар берди.

Ўзбекистон Жисмоний тарбия ва спорт вазирлиги матбуот хизмати маълум қилишича, Жисмоний тарбия ва спорт вазири Дилмурод Набиев раҳбарлигидаги Ўзбекистон спорт делегацияси халқлар ўйинларда иштирок этиш учун Қирғизистонга жўнаб кетган.

Ўзбекистон спорт делегацияси жами 76 кишидан иборат, шундан 13 та(кураш, самбо, гуштини милли камарбанди (Тожикистон кураши), қозоқ кураши бўйича, пахлавани (Эрон кураши), гюлеш (Озарбайжон кураши), аширтмали аба гюлеши (Туркия кураши), алиш кураши (Қирғизистон кураши), гореш (Туркманистон кураши), мангол бох (Мўғулистон кураши), қирғиз кураши, армрестлинг, лочин ови ва тайганлар югуриши бўйича) спорт туридан 54 нафар спортчи, 15 нафар мураббий ва 7 нафар менежер, мутахассис, ишчи гуруҳи аъзолари ва раҳбари иштирок этмоқда.

Ўйинларда 50 та спорт тури бўйича 500 дан ортиқ комплект медаль жамланмаси ўйналади. Ушбу ўйинларда Ўзбекистон спорт делегацияси илк бор иштирок этмоқда.

Мазкур ўйинларни ўтказишдан асосий мақсад миллий спорт турларини асраш, халқлар ўртасида дўстлик алоқаларини янада мустаҳкамлашдир.

2 сентябрь куни «Бир руҳда — куч бирликда» шиори остида ўйинларнинг тантанали очилиш маросими ўтказилиб, унда дунёнинг 66 та давлатидан ташриф буюрган 1556 нафар спортчи иштирок этди.

III Бутунжаҳон кўчманчи халқлар ўйинлари очилиш маросимида иштирокчиларини Қирғизистон Республикаси Президенти Сооранбай Жээнбеков қутлади. Тадбирда Қозоғистон, Туркия, Татаристон Республикалари Президентлари, Бирлашган Араб Амирликларининг Фужайра амирлиги шаҳзодаси, Венгрия Бош вазири меҳмон сифатида иштирок этишди.

Ўзбекистон вакиллар алиш кураши (Қирғизистон кураши), Армрестлинг спорт турлари бўйича баҳсларга киришди. Ўйинлардаги дастлабки ютуқлар қўлга киритилди, армрестлинг бўйича чап қўл баҳсларида 18 давлатдан ташриф буюрган 72 нафар иштирокчи орасида Дмитрий Докучаeв (75 кг.), Қудратилло Ниязи (95 кг.), Фирдавс Гафуров (105 кг.) мусобақанинг бронза медалини қўлга киритди.