Олимлар пингвин ва қисқичбақа курашини тасвирга олди (видео)

Жанубий Африканинг Нельсон Мандела номли университети олимлари Фолкленд оролларида Арктика пингвинларининг кичик қисқичбақалар билан курашини тасвирга олди. Бу ҳақда «РИА Новости» хабар қилди.

Тадқиқотчилар пингвинлар ҳаёт тарзи, ўлжа излашда ўзини тутиши ҳақида батафсил маълумот олиш учун камераларни 38 та пингвинга маҳкамлаган. Одатда бу пингвинлар «енгил ўлжа» — кичик балиқ ва қисқичбақаларни овлайди.

Камерани олган олимлар кичкина қисқичбақаларнинг жангсиз таслим бўлмаслигини аниқлади. Улар чангалларини ишга солади ёки тўда бўлиб олиб, пингвинни қурбон билан якка қолишга қўймайди. Олимларнинг таъкидлашича, улар кўп ҳолатларда ҳужумни қайтаради.