Бугун, 14 август куни пойтахтнинг Шайхонтоҳур туманида Тошкент шаҳар ҳокимлиги, Тошкент шаҳар ИИББ, Тошкент шаҳар прокуратураси ва шаҳар солиқ хизмати раҳбар ходимлари бошчилигида оммавий тозалаш ва ободонлаштириш тадбири ташкил этилди, деб ёзади Тошкент шаҳар Ички ишлар бош бошқармаси матбуот хизмати.
Шайхонтоҳур тумани 13-даҳасида қаровсиз ўсган дарахтларнинг шох-шаббаларини тартибга келтиришдан бошланган ҳашар ишлари давомида ён-атроф чиқиндилардан тозаланди, йўлларда рухсатсиз ўрнатилган тўсиқлар олиб ташланди. Ҳудудда жойлашган 19-умумтаълим мактаби ҳудудида ҳам қурилиш-реконструкция ишлари бошлаб юборилди.
Бундан ташқари, айни вақтда маҳалла фуқаролар йиғинининг янги биносида қурилиш ишлари қизғин давом этмоқда. Иккита кўп қаватли турар жой ўртасида мақсадсиз қолдирилиб кетилган бўш майдон ўрнида эса эндиликда янги кўп қаватли уй қад ростлайди. Ҳар бир кўп қаватли уйлар олдида замонавий болалар майдончаларининг қурилиши режалаштирилган.
Даҳадаги 31-кўп қаватли уйда шу кунгача том билан боғлиқ муаммолар мавжуд бўлиб, туман сектор мутасаддилари томонидан олиб борилган ўрганиш ишларидан сўнг ҳудуддаги шу ва бошқа масалалар ҳам тўлиқ бартараф этилди.
Шайхонтоҳур туманининг «Шодлик» маҳалласи аҳолисини кўпдан буён қийнаб келаётган муаммолар, яъни кўп қаватли уйлар томидан чакка ўтиши ёки бўлмаса ертўлаларда сув тошиши, кириш йўлакларининг эса таъмирталаб аҳволга тушиб қолгани бу ерда яшовчиларнинг эътирозларига сабаб бўлиб келаётган эди. Тошкент шаҳрининг 1-секторига масъул мутасаддилар саъй-ҳаракати билан бу каби узоқ йиллик муаммоларга ҳам ижобий ечим топилди, таъмирлаш ишлари учун имтиёзли кредит ажратилди.
Амалга оширилаётган таъмирлаш ишлари натижаси ўлароқ кўп қаватли уйларда истиқомат қилаётган аҳолининг турмуш шароити ҳам яхшиланмоқда. Янги таъмирдан чиққан ва зинапоялари гуллар билан безатилган йўлаклар кишига кўтаринкилик бағишлайди. Маҳалла ҳудудидаги эски гаражлар ўрнида ҳозирда замонавий автотураргоҳ барпо этилди.
Илгари кўп қаватли уйлар йўлаги олдида бетартиб қолдириладиган ва йўлларни тўсиб қўядиган автоуловлар эндиликда ёғингарчилик ва турли фавқулодда ҳолатлардан ҳимоялаган алоҳида тўхтаб туриш жойларига эга бўлди.
«Маннон Уйғур» номли маҳалланинг 23 та кўчасига янги асфальт қопламалари ётқизилди. Бугунги ободонлаштириш ишлари доирасида мактабгача таълим муассасасида ҳам қурилиш ва тозалаш ишлари олиб борилди. Тошкент шаҳар ИИББ томонидан айни пайтда Тошкент шаҳридаги қатор MTM ва болалар спорт майдончалари таъмирланиб, уларда жажжи болажонлар учун зарур шароитлар яратилмоқда.
Ана шу саъй-ҳаракатлар натижасида Шайхонтоҳур, Юнусобод, Учтепа, Олмазор ва Яшнобод туманларида болаларга завқ улашувчи масканлар барпо этилди.
Изоҳ (0)