Россияда Ravon автомобиллари нархи кескин қимматлади

Россия бозорида сотилаётган Ravon’нинг тўртта моделидан учтасининг нархи қимматлади. Бу ҳақда «Российская газета»га таяниб, «Spot» хабар бермоқда.

GM Uzbekistan ваколатхонаси R2 хэтчбеки ва Nexia седанининг нархини 50 минг рублга (тахминан 790 доллар), Gentra седанининг нархини 20 минг рублга (тахминан 310 доллар) оширди. R4 модели ҳозирча аввалги нархда сотилмоқда.

Автоматик трансмиссияга эга энг арзон машина саналувчи Ravon R2 хэтчбеки камида 489 минг рублга (7,700 доллар) сотилмоқда. Машина энг мукаммал тарзда бутланган ҳолатида 559 минг рублга (8,800 доллар) баҳоланмоқда.

Ҳозирда Россияда Nexia’ни 499 000—599 000 рублга (7,9 минг—9,5 минг доллар), R4’ни 529 000—659 000 минг рублга (8,4 минг—10,4 минг доллар), Gentra’ни эса 569 000—699 000 минг рублга (9 минг—11 минг доллар) харид қилиш мумкин.

Март ойида Россияда Ravon’нинг барча автомобиллари нархлари 10 минг—30 минг рублга қимматлаган.