ЖЧ—2018. Франция Перуни мағлуб этиб, муддатидан аввал плей-офф йўлланмасига эга чиқди
Бугун, 21 июнь санасида футбол бўйича Россияда бўлиб ўтаётган Жаҳон Чемпионати 2-тур баҳслари давом эттирилмоқда. Кун тақвимидан 3 та ўйин ўрин олганди.
Улардан бири «C» гуруҳининг икки жамоаси— Дания ҳамда Австралия ўртасидаги ўйин 1:1 ҳисобидаги дуранг натижаси билан якунланди.
Мазкур гуруҳнинг иккинчи беллашуви эса Франция ва Перу терма жамоалари ўртасида кечди. Учрашув тақдири биринчи бўлимнинг 34-дақиқасида ҳал этилди. Оливье Жирунинг берган зарбасидан сўнг тўп перулик футболчига тегиб Килиан Мбаппега келиб тушди. Мбаппе эса деярли бўш қолган дарвозани ишғол этди.
Шу тариқа 19 ёшли Мбаппе Жаҳон Чемпионатларида гол урган энг ёш франциялик футболчи бўлди. Бунгача бу натижа Давид Трезегега тегишли эди. У 20 ёшида мундиалда гол уришга эришганди.
2-турдан сўнг «C» гуруҳида Франция 6 очко билан плей-офф йўлланмасини деярли ҳал этди. Перу эса икки ўйинда ҳам мағлуб бўлди ва мусобақани билан хайрлашди. Дания ҳисобида 4, Австралия ҳисобида эса 1 очко мавжуд.
Гуруҳ босқичининг сўнгги, 3-турида Дания Франция билан, Перу эса Австралия билан кураш олиб боради.
Жаҳон Чемпионати
«C» гуруҳи, 2-тур беллашувлари
21 июнь, пайшанба
Франция—Перу 1:0
Гол: 1:0 — 34 Килиан Мбаппе.Франция: Льорис, Варан, Люка Эрнандес, Павар, Умтити, Погба (Нзонзи, 88), Канте, Матюиди, Гризманн (Фекир, 80), Жиру, Мбаппе (Дембеле, 75).
Перу: Галесе, Рамос, Трауко, Адвинкула, Родригес (Сантамария, 46), Куэва (Руидиас, 82), Йотун (Фарфан, 46), Флорес, Акино, Каррильо, Герреро.
Огоҳлантиришлар: Матюиди (16), Герреро (23), Акино (81), Погба (86).
