Республика ишчи гуруҳи Фарғонанинг Қўштепа туманида 7600 та муаммо аниқланди
Фарғона вилояти Қўштепа туманида Республика ишчи гуруҳи томонидан ижтимоий-маънавий муҳитни ўрганиш чоғида 27919 та аҳоли хонадонига кирилиб, 7600 та муаммо аниқланди. Уларнинг 56 фоизи жойида ҳал қилинди. Бу ҳақда ЎзА хабар бермоқда.
Жумладан, 149 нафар фуқаро ишга жойлаштирилди, 5200 кишининг саломатлиги тикланди. 11 километр йўлга шағал ётқизилди, 4,5 минг аҳолининг тоза ичимлик суви таъминоти яхшиланди.
Ишчи гуруҳи ўрганиши чоғида 760 нафар фуқаро иш сўраб мурожаат қилди. Бандлик ва меҳнат муносабатлари вазирлиги бир ҳафта давомида туманда 261 та бўш иш ўринлари мавжудлигини аниқлади. Икки кунлик меҳнат ярмаркаси давомида 178 нафар мурожаатчи иш ўрнига эга бўлди. Туман раҳбарлари ички ресурсларни излаб топиш у ёқда турсин, мавжуд бўш иш ўринлари ҳақида ҳатто маълумотга ҳам эга эмас.
Тумандаги 51 та маҳалланинг аксариятида раислар ва профилактика инспекторлари ўртасида ҳамкорлик тизими самарали йўлга қўйилмаган. Туман ҳокимининг, ички ишлар бўлимининг ёшлар масалалари бўйича ўринбосарлари, Ёшлар иттифоқи вакиллари ўртасида ёшларнинг жиноятчилик ва ҳуқуқбузарликлар содир этиши олдини олиш бўйича аниқ ҳамкорлик механизми ишлаб чиқилмаган. Прокурор секторида 27 та жиноят, ҳоким секторида 22 та жиноят содир этилганини қандай тушуниш мумкин? Туманда катта имкониятлар мавжуд бўлса-да, ҳоким шу ҳудуд раҳбари сифатида ишни тизимли ва самарали ташкил этмаган.
