Ўзбекистон Журналистлари ижодий уюшмаси Фарғона вилоят бўлими вакиллари ҳамда «Доно нашриёти» жамоаси Халқаро болаларни ҳимоя қилиш куни муносабати билан Фарғона шаҳридаги ногиронлиги бўлган болалар «Мурувват уйи»да бўлди. Бу ҳақда «Дарё»нинг Фарғонадаги мухбири хабар берди.
Улар болаларни байрам билан табриклаб, телевизор ҳамда «Олам аро», «Билимдон», «Знайка», «Доно ворд» журналларининг янги сонларини совға қилди. Болажонлар билан ўтказилган викторинада улар ўзлари ёд олган шеър, бадий асарлардан парча ўқиб берди. Ғолиблар «Доно нашриёти»нинг махсус совғалари билан тақдирланди.
Ўзбекистон Журналистлари ижодий уюшмаси Фарғона вилояти бўлими раиси Муҳаммаджон Обидов «Мурувват уйи» тарбияланувчиларига уюшма ҳомийлигида чоп этилган янги китобларни топширди.
— «Мурувват уйи» тарбияланувчилари орасида келгусида оммавий ахборот воситаларида ишлашга қизиққанлар бор экан. Биз улар билан юқори синф ўқувчиси бўлганларида алоҳида машғулотлар олиб борамиз. «Доно нашриёти» эса уларни болалар журналларининг янги сонлари билан бепул таъминлаб туради, – дейди Муҳаммаджон Обидов.
Изоҳ (0)