Адлия вазирлиги томонидан Хотин-қизларни ва оилани қўллаб-қувватлаш жамоат фонди давлат рўйхатидан ўтказилди. Бу ҳақда Адлия вазирлигининг Telegram’даги «Ҳуқуқий ахборот» канали орқали маълум қилинди.
«Хотин-қизларни қўллаб-қувватлаш ва оила институтини мустаҳкамлаш соҳасидаги фаолиятни тубдан такомиллаштириш чора-тадбирлари тўғрисида»ги Президент фармонига мувофиқ, Хотин-қизларни ва оилани қўллаб-қувватлаш жамоат фондини ташкил этиш белгиланган эди.
Шу муносабат билан Адлия вазирлиги томонидан Хотин-қизларни ва оилани қўллаб-қувватлаш жамоат фонди давлат рўйхатидан ўтказилди.
Мазкур ташкилотнинг асосий мақсади хотин-қизларни ва оилани ҳар томонлама қўллаб-қувватлаш, шу жумладан, оғир ижтимоий аҳволга тушиб қолган хотин-қизлар ва оилаларга, ногиронлиги бўлган аёлларга моддий ёрдам кўрсатиш ҳисобланади.