Тошкент шаҳридаги Чилонзор туманида истиқомат қилаётган уруш қатнашчиси Виктор Тимофеевга Мудофаа вазирлиги алоқачиларининг байрам табриги ёзилган торт совға қилинди. Бу ҳақда вазирлик матбуот хизмати хабар берди.
Тошкент ҳарбий округига қарашли «Чирчиқ» умумқўшин дала ўқув майдонида курсантлар томонидан уруш қатнашчиси Василий Жучковга саҳналаштирилган уруш манзараси тақдим этилди. Собиқ аскар ҳарбийлар билан дала майдонида тушлик қилди.
Шарқий ҳарбий округи Маънавият ва маърифат маркази томонидан Фарғона, Наманган ҳамда Анжидон шаҳридаги дам олиш масканларида, савдо мажмуаларида жанговар сафлардаги куй-қўшиқлар ижро этилди.
Жануби-ғарбий махсус ҳарбий округи қўшинлари қўмондони Қарши шаҳри Ўзбекистон кўчасида истиқомат қилаётган уруш қатнашчиси Иван Бехга Президент совғасини топширди. Отахон кўзларига ёш олиб, миннатдорчилик билдирди. Уруш фахрийси ҳарбий аёлларни рақсга таклиф этди.
Марказий ҳарбий округи қўмондонлиги томонидан бир нечта уруш қатнашчиларига совғалар берилди ҳамда эзгу ниятлар билан ўзбекона тўн кийдирилди.
Изоҳ (0)