Ахборот технологиялари ва коммуникацияларини ривожлантириш вазирлигида Ахборот технологиялари ва коммуникацияларини ривожлантириш масалалари бўйича жамоатчилик кенгашининг илк йиғилиши бўлиб ўтди. Бу ҳақда ЎзА хабар бермоқда.

Кенгаш аъзолари Ахборот технологиялари ва коммуникацияларини ривожлантириш вазири Азим Аҳмадхўжаев раислигида Президентнинг «Электрон тижоратни тубдан такомиллаштириш чора-тадбирлари тўғрисида»ги қарор лойиҳасини ўрганиб чиқди. Турли соҳа мутахассисларига ушбу лойиҳа ва 2018–2020 йилларга мўлжалланган Электрон тижоратни ривожлантириш бўйича чора-тадбирлар дастурининг дастлабки вариантлари тақдим этилди. Иштирокчилар бу борада ўз фикр-мулоҳазаларини билдириб, тегишли таклифлар киритди.

Йиғилишда 4 май куни вазирлик ҳузурида ташкил этилган Ахборот технологиялари ва коммуникацияларини ривожлантириш масалалари бўйича жамоатчилик кенгашининг асосий мақсад ва вазифалари ҳақида сўз юритилди. Хусусан, кенгаш зиммасига вазирликнинг устувор вазифаларини ишлаб чиқиш ва уларни амалга оширишда иштирок этиш, фуқароларнинг вазирлик фаолиятига бўлган ишончини ошириш ҳамда аҳоли ва тадбиркорлик субъектлари билан яқин ҳамкорлик алоқалари ўрнатилишини таъминлаш орқали вазирлик фаолияти ошкоралиги ва самарадорлигини ошириш вазифалари юклатилган.

Йиғилиш кун тартибига кўра, иштирокчилар кенгаш раисини сайлади. Унга кўра, тадбиркор Б. Орифжонов Жамоатчилик кенгаши раиси, SAP компаниясининг (Ўзбекистон) ривожлантириш бўйича директори Л. Адҳамова раис ўринбосари этиб сайланди.