Францияда 8-19 май кунлари бўлиб ўтадиган 71-Канн халқаро кинофестивалида илк бор «Ўзбекистон» павильони ташкил этилди. Бу ҳақда «Халқ сўзи» хабар бермоқда.
Павильонда фестиваль иштирокчилари ва меҳмонларига Ўзбекистоннинг туристик салоҳияти, фильм суратга олиш учун бой имкониятлар намойиш этилади. Бу хорижлик кинокомпаниялар билан самарали ҳамкорликни йўлга қўйиш, энг асосийси, Тошкент шаҳрида бўлиб ўтадиган PROlogue халқаро фестивалига дунёнинг турли бурчагидан мутахассис ва ёш киноижодкорларни жалб этиш имконини беради.
— «Ўзбекистон» павильонида тақдим этиладиган тарихий-меъморий обидалар, мамлакат табиатини акс эттирувчи киножурналлар ва бошқа тарқатма материаллар хорижлик киносаноат вакилларини эътиборсиз қолдирмайди, — дейди Ёш киноижодкорлар кенгаши раиси Ойбек Абдушукуров. — Бундан ташқари япониялик киноижодкорлар ҳамкорлигида Тошкент ва Жиззахда суратга олинган Dragonҳеад, Эрон ва Россия киноижодкорлари Бухорода тасвирга туширган «Умар Ҳайём», шунингдек, россиялик ижодкорлар томонидан Хоразмда суратга олинган кўплаб кинокартиналар ҳақида ҳам маълумотлар берилади. Буларнинг барчаси нафақат Ўзбекистоннинг кино санъати ва саноати, балки туристик салоҳиятини ҳам оширишга хизмат қилади.
Изоҳ (0)