Адлия вазирлиги ҳафта давомида қабул қилинган қонунлар муҳокамасига бағишланган брифинг ташкил этади

Ўзбекистон Адлия вазирлиги томонидан 5 май куни соат 11:00 да «Адлия ахбороти» номли брифинг ташкил этилади. Бундай брифинг ўз форматига кўра вазирлик томонидан илк бор ўтказилмоқда, деб ёзади ЎзА.

Брифингда ҳафта давомида қабул қилинган қонун ҳужжатлари ҳақида, шу жумладан, давлат раҳбарининг «Қайта тикланадиган энергия манбалари соҳасида инвестиция лойиҳаларини амалга оширишга оид қўшимча чора-тадбирлар тўғрисида»ги қарори, ҳукуматнинг «Республикада замонавий саноат усулида омухта ем ишлаб чиқаришни ташкил этиш чора-тадбирлари тўғрисида»ги қарори ҳамда бошқа муҳим қонун ҳужжатлари ҳақида маълумотлар берилади.

Шунингдек, брифингдан сўнг Президент томонидан янги имзоланган «Мамлакатни демократик янгилаш жараёнида фуқаролик жамияти институтларининг ролини тубдан ошириш чора-тадбирлари тўғрисида» ўта муҳим ҳужжат ҳақида пресс-конференция ўтказилиши режалаштирилган.

Тадбир манзили — Тошкент шаҳри, Шароф Рашидов кўчаси, 16-уй (мўлжал — «Пойтахт» бизнес-маркази).