Трамп ва Ким Чен Иннинг учрашуви Швейцарияда бўлиб ўтиши мумкин

АҚШ президенти Дональд Трамп ва КХДР етакчиси Ким Чен Иннинг учрашуви Швейцарияда бўлиб ўтиши мумкин. Бу ҳақда 18 апрель, чоршанба куни Американинг NBC телеканали маълум қилди, деб ёзади «ТАСС».

Телеканал манбасига кўра, икки мамлакат вакиллари саммит қаерда ўтиши ҳақида якуний қарор қабул қилмаган. Пекин, Пхеньян ва Улан-Батор вариантлар сифатида кўриб чиқилган, бироқ хавфсизлик нуқтаи назаридан рад этилган.

«Мансабдорларнинг сўзларига қараганда, америкалик расмий шахслар нейтрал жойлар тарафдори, устунликка эга вариантлардан бири — Швейцария», — таъкидланади хабарда.

Аввалроқ Bloomberg агентлиги учрашув ўтказилиши мумкин бўлган жойлардан бири Швеция эканлигини маълум қилган эди.