Туркия президенти Ражаб Тоййиб Эрдўғон расмий Анқара АҚШ, Буюк Британия ва Франция томонидан Сурияга берилган авиазарбаларни ижобий қабул қилгани ва буни Суриянинг Дума шаҳрида кимёвий ҳужум уюштирилгани ҳақидаги хабарлар учун асосли жазо деб ҳисоблашини маълум қилди. Бу ҳақда «РИА Новости» хабар бермоқда.
«Биз бу оқшом ухлаганимиз йўқ, Суриядаги вазиятни кузатиб бордик. Биз бу операцияни тўғри, деб ҳисоблаймиз. Чунки кимёвий ҳужумни жазосиз қолдириб бўлмайди. Айбдорлар жазосини олмоғи керак», — деди Эрдўғон.
Эрдўғон, шунингдек, Сурия президенит Башар Асад бошчилигидаги тузумни мухолифатни қиришда айблади.
«Бу тузум нафақат кимёвий, балки оддий қурол билан ҳам одамларни ўлдиряпти. Оддий қуролда кимёвий қурол билан ўлдирганидан кўпроқ ўлдиряпти», — деди Туркия давлат раҳбари.
«Сурияда халқнинг тинч ва хотиржам яшаши учун ҳам Башар Асад тузумига қарши, ҳам ИШИДга қарши, ҳам бошқа террорчиларга қарши ягона нуқтаи назар билан ҳаракат қилиш керак», — дея қўшимча қилди Эрдўғон.
Изоҳ (0)