Суперлига. «Навбаҳор» 2 та гол фарқи билан олдинда бориб, якунда «Сўғдиёна»га мағлуб бўлди, «Бунёдкор» эса яна ғалаба қозонди

Бугун, 11 апрель санасида футбол бўйича Ўзбекистон Суперлигаси баҳсларининг 6-турига старт берилди.

Кун тақвимидан учта учрашув ўрин олганди. Улардан иккитаси ўз ниҳоясига етди.

Жиззахда «Сўғдиёна» ҳамда Наманганнинг «Навбаҳор» жамоалари ўртасидаги учрашув мезбонларнинг иродали ғалабаси билан якунланди. «Навбаҳор» 2 та гол фарқи билан олдинда бориб, якунда ўз дарвозасидан 3 та олиб чиқди ва мағлуб бўлди. Шу тариқа яқинда бош мураббийликка тайинлаган Сергей Лушчаннинг «Сўғдиёна»даги дебюти омадли чиқди.

Иккинчи ўйин Тошкентда «Бунёдкор» ва Бекободнинг «Металлург» жамоалари ўртасида кечди. Беллашув тақдири иккинчи бўлимда ҳал этилди. Суперлига карвонбошиси «Бунёдкор» меҳмонлар дарвозасини уч марта ишғол қилган бўлса, «Металлург» бунга фақат битта гол билан жавоб қайтара олди. Шу тариқа Миржалол Қосимов шогирдлари ўз пешқадамлигини янада мустаҳкамлаб олди.

Айни дамда турнинг марказий учрашуви Қаршида «Насаф» ҳамда «Локомотив» жамоалари ўртасида кечмоқда.