«Тошкент—Бишкек—Рибачье—Тошкент» йўналишида қатнайдиган поезд чипталарига чегирмалар эълон қилинди

«Ўзбекистон темир йўллари» АЖ «Тошкент—Бишкек—Рибачье (Иссиқкўл)—Тошкент» йўналишида қатнайдиган поезд чипталарига чегирмалар эълон қилди, деб хабар берди «Podrobna.uz».

Компания маълумотларига кўра, чегирмалар фақатгина чипталарни олдиндан сотиб олиш ҳолатларида тақдим этилади.

Масалан, купе ва люкс классидаги чипталарни поезднинг жўнаш санасидан 45—31 кун олдин сотиб олган йўловчига 45 фоиз чегирма берилади, 30—6 кун олдин сотиб олганларга эса 35 фоиз миқдори чегирма тақдим этилади.

Оммабоп плацкарт вагонлари учун ҳам чегирмалар бўлади. Жўнаш санасидан 45—31 кун олдин сотиб олинган чиптага 35 фоиз, 30—6 кун олдин сотиб олинганига эса 25 фоиз чегирма берилади.

Таъкидлаш керакки, чегирмалар бир мамлакат ташқарисида сотиб олинган чипталарга тааллуқли эмас.

Эслатиб ўтамиз, «Тошкент—Бишкек—Рибачье» йўналиши бўйича мунтазам темирйўл қатновларининг биринчи поезди 22 март куни соат 20:50 да Тошкент Марказий вокзалидан йўлга чиққани ҳақида хабар берилганди.