Шимолий Корея етакчиси Ким Чен Ин рафиқаси Ли Соль Чжу билан биргаликда сўнгги етти йилда илк бора хорижга сафар уюштирди. Улар Пекинда Хитой раҳбари Си Цзиньпин билан учрашди, деб хабар беради «РБК».
КХДР раҳбари Ким Чен Иннинг Хитойга ташрифи 2011 йилда ҳукумат тепасига келганидан буён биринчи маротаба хорижга чиқиши ҳисобланади. Пекинга боришига Си Цзиньпиннинг қайтадан Хитой раиси этиб сайлангани сабаб бўлгани айтилмоқда.
Ташриф борасида расман эълон қилинмади. Ҳафта бошида Пекинда хавфсизлик чоралари кучайтирилган бўлса, сешанба куни шаҳарнинг темир йўл вокзали жойлашган томонига давлат рақамлари бўлмаган автомобиллар кортежи ҳаракатланган. Шундан кейин ОАВлар вокзалга Шимолий Кореядан махсус поезд келганлигини маълум қилди.
Хитой ва КХДР етакчилари Корея ярим оролидаги вазиятни муҳокама қилди ва икки мамлакат ўртасидаги дўстликни қўллаб-қувватлашга тайёр эканликларини билдирди.
Ким Чен Ин Жанубий Кореяга нисбатан муносабатни ўзгартириш ниятида эканлигини маълум қилди.
Ташриф якунида Си Цзиньпин Ким Чен Инни яна бир бор Хитойга келишга таклиф этди. Бунга жавобан КХДР раҳбари ҳам Хитой раисини Пхеньянга таклиф қилди.
Изоҳ (0)