Поп туманидаги собиқ «Узрубероид» масъулияти чекланган жамияти негизида ташкил этилган кичик саноат ҳудудида дастлабки лойиҳани амалга оширишга киришилди. Бу ерда хитойлик инвесторлар билан ҳамкорликда цемент заводи қурилмоқда, деб хабар беради «Халқ сўзи».
«Попцемент» қўшма корхонаси ишга тушиши билан маҳаллий хом ашёдан йилига 500 минг тоннагача сифатли қурилиш ашёси тайёрлаш имконияти юзага келади. Бунинг учун 54 миллион доллар сармоя йўналтирилмоқда.
Бизнес-режага мувофиқ, лойиҳани жорий сентябр ойида ниҳоясига етказиш кўзда тутилган. Шунда бу ерда 300 кишининг бандлиги таъминланади.
— Айни пайтда бинокорларимизнинг цементга бўлган эҳтиёжи асосан бошқа вилоятлардан келтириладиган маҳсулот ҳисобига қопланмоқда, — дейди вилоят иқтисодиёт ва ҳудудларни комплекс ривожлантириш бош бошқармаси бош мутахассиси Фарҳод Мадраҳимов. — Яқин вақт ичида ижросини топадиган уч лойиҳа шарофати билан йилига 1,2 миллион тоннадан кўпроқ қурилиш хом ашёсини Наманганнинг ўзида ишлаб чиқариш йўлга қўйилади. Бу цемент таъминотидаги муаммолар ечимини топишидан ташқари жойларда 400 га яқин янги иш ўринлари яратилади, дегани.
Изоҳ (0)