Хурмонинг фойдали ва зарарли хусусиятлари

Хурмо — мазали ва фойдали мева. Лекин унинг ножўя самаралари ҳам бор.

Хурмонинг фойдаси

Ҳамма тилла рангли мевалар каби хурмода ҳам бета-каротин кўринишидаги А витамини жуда кўп.

А витамини — ҳужайраларни эркин радикаллардан ҳимоя қилувчи кучли антиоксидант бўлиб, қаришни секинлаштиради ва саратоннинг ривожланиш хавфини камайтиради.

Шунингдек  А витамини кўриш қобилиятини яхшилашга ёрдам беради.

Бета-каротин терини ультрабинафша нурларининг зарарли таъсиридан, қуриб қолишдан ва ёрилишдан ҳимоя қилади.

Иммунитетни мустаҳкамлайди

Хурмо ўз таркибидаги яна бир антиоксидант билан мақтаниши мумкин. Бу C витамини — ҳаммага маълум бўлган иммунитет ҳимоячиси. Меванинг 100 граммида шамоллаш ва гриппнинг олдини олишда ёрдам берувчи бу витамин кунлик меъёрининг 10 фоизи мавжуд.

Кайфиятни кўтаради

Хурмонинг таркибида моносахаридлар: глюкоза ва фруктозалар кўп бўлгани учун у ширин. Ва бу шакарнинг энг фойдали туридир. У юракни мустаҳкамлайди ва кайфиятни кўтаради, қоматга эса сахарозадек кучли таъсир кўрсатмайди.

Хурмонинг зарари

Хурмо таркибида танин моддасининг кўплиги қабзиятни келтириб чиқариши мумкин. Хурмони бир неча йиллар давомида мунтазам равишда ҳаддан ташқари кўп истеъмол қилиш меъда ичида безоарлар — тўлиқ ҳазм бўлмаган моддалардан ташкил топган қаттиқ шарчаларнинг пайдо бўлишига олиб келади.

Терининг сарғайишига сабаб бўлиши мумкин

Организмда бета-каротиннинг ҳаддан ташқари кўп миқдори айниқса болаларда терининг сарғайишига олиб келиши мумкин. Албатта, бу ҳолат саломатлик учун хавф туғдирмайди.

Қанча хурмо ейиш мумкин?

Хурмонинг салбий самараларини камайтириш учун фақат пишган меваларни енг, чунки уларда танинлар камроқ.

Қабзиятни келтириб чиқарувчи танинлар сабабли уч ёшгача болаларнинг хурмо ейиши мумкин эмас.

Манба: «Zdorovie.com»