Австралиядаги ҳайвонот боғи қора каркидонларни сақлаб қолиш дастурини амалга оширмоқда

Австралиянинг Taronga Western Plains Zoo ҳайвонот боғи қора каркидонларни сақлаб қолиш дастурида иштирок этмоқда, деб ёзади National Geographic. 2017 йил у учун омадли келди: бир йўла иккита каркидон боласи туғилди.

Каркидонлар учун энг катта хавф браконьерлик бўлган ва шундай бўлиб қолмоқда.

Taronga Western Plains Zoo 1977 йилда Сидней ҳайвонот боғига сиғмай қолган жониворларни ўз қаноти остига олиш учун қурилган. 1994 йилда у ерга Зимбабведан олтита қора каркидон келтирилди. 2010 йилда ҳайвонот боғида иккинчи авлод қора каркидонлари туғилди, 2017 йилда эса бир йўла иккита каркидон боласи дунёга келди.

Апрелда туғилган урғочи каркидон ҳайвонот боғида туғилган қора каркидонларнинг учинчи авлодини «очиб берди». Октябрда дунёга келган эркак каркидон эса дастур тарихидаги энг йирикларидан бири бўлди: туғилган вақтида у қарийб 40 кг тош босди.

Ҳайвонот боғида дастур муваффақият билан амалга ошаётганини таъкидлашмоқда: жами бўлиб 14 та қора каркидон боласи дунёга келди.