Сооронбай Жеенбеков расман Қирғизистон президенти лавозимига киришди, деб ёзади «ТАСС».
Инаугурация «Ала-Арча» давлат қароргоҳидаги «Энасой» залида бўлиб ўтди. Жеенбеков Қирғизистон халқига содиқликка қасамёд қилди, Марказий сайлов комиссияси раисидан гувоҳнома ва штандарт олди. Олтин ва кумушдан ясалган кўкрак белгиси индивидуал ҳисобланади, унга президентнинг исм-шарифи ўйиб ёзилган.
Ўз инаугурация нутқида Жеенбеков халққа хизмат қилишга, фуқаролар ҳаётини яхшилашга ва давлатни мустаҳкамлашга ваъда берди. Шунингдек, у коррупцияга қарши шафқатсиз кураш олиб боришини ва «жамиятни тозалаш учун шароитлар» яратишини айтди.
Инаугурация маросимидан сўнг янги президент Жеенбеков ва собиқ давлат раҳбари Алмазбек Атамбаев парламентга йўл олди. У ерда фахрий қоровул ротаси саф тортди, Қирғизистон Миллий гвардияси қўмондони Қирғизистоннинг янги президентига бош қўмондон сифатида рапорт берди.
Сўнг икки сиёсатчи президент иш кабинетига кетди, у ерда Атамбаев ишларни Жеенбековга топширди.
Изоҳ (0)