Жанубий Кореяда «Ўзбекистон Республикаси Президенти Шавкат Мирзиёев» номли китоб корейс тилида 50 минг нусхада чоп этилди. Бу ҳақда ЎзА хабар бермоқда.
Нашрда Шавкат Мирзиёевнинг аввал Ўзбекистон Президенти вазифасини бажарувчи, сўнг Президент сифатидаги фаолияти ҳақида батафсил маълумот берилган. Давлат раҳбарининг мамлакат ва хорижда сўзлаган нутқлари, жумладан, Президент лавозимига киришиш маросими, Конституция байрами, Янги йил байрами, БМТ Бош ассамблеяси сессиясидаги нутқидан иқтибослар келтирилган.
Китобда Президент Шавкат Мирзиёев ташаббуси билан барча соҳаларда бошланган ислоҳотлар таҳлилига катта эътибор қаратилган. Унинг «2017—2021 йилларда Ўзбекистонни ривожлантиришнинг бешта устувор йўналиши бўйича Ҳаракатлар стратегияси» номли бобида ушбу дастур чуқур таҳлил қилган.
Шунингдек, Шавкат Мирзиёевнинг хорижий давлатларга ташрифи, Ўзбекистонга ташриф буюрган бир неча давлат раҳбарлари ҳамда нуфузли халқаро ташкилотлар етакчилари билан бўлиб ўтган музокаралари ҳақида атрофлича маълумот берилган.
Китобда Ўзбекистон ва Жанубий Корея ўртасидаги кўп йиллик савдо-иқтисодий ва маданий-гуманитар ҳамкорликка ҳам кенг ўрин ажратилган.
Uz Kor Economy Media Group томонидан 20 ноябрь куни нашр этилган китоб 8 бўлим, 320 саҳифадан иборат бўлиб, кўплаб суратлар билан бойитилган. Унинг муаллифи машҳур журналист ва ёзувчи Чо Чол Хён.
Изоҳ (0)