Ўзбекистон Миллий хавфсизлик хизмати ходимлари Киев орқали Таиландга аёлларни фоҳишаликка олиб чиқиб кетиш каналини бартараф қилди. Ушбу канал Украина чегара хизматининг бир ходими ёрдамида фаолият юритган, деб аниқлаштиради 1News.
Хабарда таъкидланишича, МХХнинг Бухоро вилоят бошқармаси Тошкент – Киев – Бангкок йўналиши бўйича аёллар ва қизларни олиб чиқиш билан шуғулланувчи жиноий гуруҳ фаолиятига чек қўйди.
Украинада одам савдоси қурбонларини шу мамлакат фуқароси кутиб олиб, улар Киев аэропортининг чегара хизматида ишловчи рафиқасининг кўмагида Таиландга юборилишини таъминлар эди.
МХХнинг Хоразм вилоят бўлинмаси ходимлари, шунингдек, Ўзбекистондан БААга қизларнинг юборилиши билан шуғулланувчи йирик жиноий гуруҳни фош қилди. Жинсий қуллик қурбонларининг олиб чиқиб кетилиши учун транзит канал сифатида Қозоғистон ва Россия ҳудуди ишлатилар эди.
ЕХҲТга кўра, Ўзбекистон аёллар, эркаклар ва болаларнинг меҳнат ва жинсий қулликка солиниши соҳасидаги одам савдоси оқими чиқадиган ҳамда транзит ўтадиган мамлакатдир. Хусусан, ўзбекистонлик эркаклар Қозоғистон ва Россияда меҳнат эксплуатациясига, аёллар эса Жануби-Шарқий Осиё мамлакатлари ҳамда Туркияда жинсий қулликка учрайди.
Изоҳ (0)