АҚШ расмийларининг фикрича, 31 октябрь куни Нью-Йоркнинг Манхэттен қисмида пиёдаларни босиб кетган келиб чиқиши ўзбекистонлик Сайфулло Соипов шаҳарнинг Бруклин кўпригида янада кўпроқ одамларга зарар етказиш ниятида бўлган. Бу ҳақда «ТАСС» хабар бермоқда.
Нью-Йорк штати Жанубий округи прокуратурасининг даъво аризасида таъкидланишича, Нью-Йоркдаги теракт ижрочиси Сайфулло Соипов имкон қадар кўпроқ одамни қурбон қилиш истагида бўлганини тан олган. Ариза матни The New York Times’да берилган.
Бундан ташқари, Сайфулло Соипов ИШИД террорчилик ташкилоти тарғиботи таъсири остида ҳаракат қилганини ҳам тан олган.
«Соипов имкон қадар кўпроқ одамни ўлдириш ниятида бўлган. У ҳужум вақтида автомобилнинг олд ва орқа томонига ИШИД байроғини илиб қўймоқчи бўлган, бироқ, ўзига бемаҳал эътибор тушишидан қочиб, фикридан қайтган», — дейилади прокуратура ҳужжатида.
Ҳужжатда қайд этилишича, Соипов ИШИДнинг тарғибот материалларини ўз уяли телефони орқали кузатиб борган. У, терактдан сўнг шифохонага ётқизилгач, ўз палатасига ИШИД байроғини жойлаштириш истагини билдирган.
Округ прокурори Ён Кимнинг сўзларига кўра, Соиповнинг телефонидан «ИШИД томонидан тарқатилган кўплаб материаллар, хусусан, одамларни қатл этиш билан боғлиқ 19 та видеолавҳа» топилган.
ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан «террорчилик ташкилоти» деб топилган.
Изоҳ (0)