ЎФФ қошида ташкил этилган хавфсизлик бошқармасидаги фаолияти билан мухлисларга таниш бўлган Аҳрол Иноятов ўз вазифасидан озод этилди. Бу ҳақда ташкилот матбуот хизмати хабар берди.
Аҳрол Иноятов ЎФФнинг ҳалол ўйинлар учун масъул офицери сифатида ишлаб келаётганди. Ташкилотнинг навбатдаги мажлиси унинг ишдан олиниши билан якунига етди.
Ўзбекистон футболидаги келишилган ўйинларни аниқлашга масъул ҳисобланган Аҳрол Иноятов даврида бирорта ҳам келишилган ўйин фош қилинганича йўқ. У келишилган ўйинларга қарши курашиш қўмитаси экспертларига ҳам раҳбарлик қилиб келаётганди. Бунда мамлакат футболида чиндан ҳам келишилган ўйинлар бўлмаганми ёки Аҳрол Иноятов борларини аниқлай олмаганми, маълум эмас.
Эндиликда ЎФФ хавфсизлик бошқармасининг ҳалол ўйинлар учун офицерлиги лавозимига номзодларни кўриб чиқаётгани айтилган.