Нью-Йорк Федерал захира банки раҳбари Уильям Дадли Пуэрто-Рикога 100 долларлик купюралар ортилган самолётни йўллади. Бу ҳақда, Bloomberg’га асосланиб, Meduza хабар бермоқда.
Дадли шу йўл билан Пуэрто-Риконинг йирик банклари раҳбарларининг АҚШ Федерал захира тизими (ФЗТ)га мурожаатига муносабат билдирди. Улар «Мария» тўфонидан сўнг Пуэрто-Рикода нақд пулларнинг ўткир тақчиллиги юзага келганидан шикоят қилган эди.
Пуэрто-Рико банклари ўз ходимларига нақд пулда маош тўлаш истагини билдирган корпоратив мижозлардан юз минглаб долларларни ечиб олиш ҳақида сўровлар олган. Тўфондан сўнг фаолияти қайта тикланган банкоматлар олдида нақд пул олиш истагидаги одамларнинг катта навбатлари пайдо бўлган.
АҚШ Федерал захира тизимига қилинган мурожаат муаллифларидан бири — Popular Inc. банки раҳбари Ричард Каррион нақд долларлар ортилган самолёт Пуэрто-Рикога келганини тасдиқлади, бироқ у қанча пул олиб келганига аниқлик киритмади.
Нью-Йорк Федерал захира банки матбуот хизмати эса мазкур хабарлар юзасидан ҳеч қандай изоҳ бермади.
«Биз нақд пул билан боғлиқ муаммолар юзага келишини тахмин қилгандик. Бироқ бу муаммолар кўлами бу қадар катта бўлади, деб кутмагандик», — деди Ричард Каррион.
Пуэрто-Рико АҚШ ҳукумати бошқаруви остида бўлиб, уларнинг валюта тизими умумийдир.
20 сентябрь куни Пуэрто-Рикога ёпирилган «Мария» тўфони оролга катта талофат етказди. Хусусан, Пуэрто-Рикода марказлашган электр таъминоти тизими тўлиқ ишдан чиқди. Тўфон оқибатида, сўнгги маълумотларга кўра, оролда 39 киши ҳалок бўлган.
Пуэрто-Рикога АҚШ маъмурияти томонидан кўрсатилган ёрдам кўлами ва бу ёрдамнинг тезкор эмаслиги жамоатчилик томонидан танқид остига олинди. Хусусан, АҚШ президенти Дональд Трамп ҳаракатсизликда айбланди.
Изоҳ (0)