Жанубий Корея президентининг халқ томонидан қўллаб-қувватланиши кетма-кет 3-ҳафта пасаймоқда

Корея Республикаси президенти Мун Чжэ Иннинг аҳоли томонидан қўллаб-қувватланиши кетма-кет учинчи ҳафта пасаймоқда. Бу ҳақда Realmeter агентлиги томонидан 11-дан 13 сентябрга қадар 1,5 минг вояга етган аҳоли ўртасида ўтказилган сўровнома натижалари гувоҳлик беради, деб ёзади «ТАСС».

14 сентябрь, пайшанба куни чоп этилган тадқиқот маълумотларига кўра, мамлакат катта ёшли аҳолисининг 66,9 фоизи Мун Чжэ Иннинг президентлик лавозимидаги фаолиятини маъқуллайди. Бу ўтган ҳафтадаги кўрсаткичдан 2,3 фоизга кам.

Давлат раҳбари фаолиятига нисбатан салбий муносабат билдирганлар 26,8 фоизни ташкил этди. Агентликнинг таъкидлашича, бу кўрсаткич 2,2 фоизга ошган.

Таҳлилчилар фикрича, бу ҳолатни Жанубий Корея жамиятининг КХДРнинг янги ядро синови ўтказиши юзасидан ташвишланиши билан изоҳлаш мумкин.