24 август куни Тошкентда бўлиб ўтган Ўзбекистон Республикаси Олий Мажлиси Сенатининг ўн биринчи ялпи мажлисида сенаторлар 30 июнь куни «Ўзбекистон Республикаси ёшлари куни» деб белгиланадиган «Ўзбекистон Республикаси ёшлари кунини белгилаш тўғрисида»ги қонунни кўриб чиқди. Бу ҳақда ЎзА хабар берди.
2017 йил 30 июнда бўлиб ўтган «Камолот» ёшлар ижтимоий ҳаракатининг IV қурултойида Ўзбекистон ёшлар иттифоқини тузиш тўғрисидаги қарор қабул қилинди. Ушбу қурултойда 30 июнь кунини мамлакатда Ўзбекистон ёшлари куни, деб эълон қилиш таклиф этилди.
Сенаторларнинг фикрича, қонуннинг қабул қилиниши ёшларга оид давлат сиёсатини изчил ва самарали рўёбга чиқаришга, ёшларни ҳар томонлама қўллаб-қувватлашга, уларнинг ҳуқуқлари ва қонуний манфаатларини ҳимоя қилиш тизимини тубдан ислоҳ қилишга кўмаклашади.
Шундан кейин сенаторлар Ўзбекистон Республикаси Қишлоқ хўжалиги ходимлари куни этиб декабрь ойининг иккинчи якшанбасини белгилашни назарда тутувчи «Ўзбекистон Республикаси қишлоқ хўжалиги ходимлари кунини белгилаш тўғрисида»ги Ўзбекистон Республикасининг қонунини кўриб чиқди.
Сенаторлар қишлоқ хўжалигида чуқур иқтисодий ислоҳотларни амалга ошириш натижасида аграр тармоқнинг бозор иқтисодиёти талабларига жавоб берадиган янги тизими шаклланганлигини қайд этди. Ҳозирги вақтда 3,6 миллион ходим ва хизматчи аграр тармоқда фаолият кўрсатмоқда. Қишлоқ хўжалигининг мамлакат ялпи ички маҳсулотидаги улуши 17,2 фоизни, йиллик ўсиш 6-7 фоизни ташкил этмоқда.
Бундай натижаларга эришишда тармоқнинг барча ходимлари ва хизматчилари – фермерлар, деҳқонлар, механизаторлар, пиллачи ва чорвадорлар, қишлоқдаги тадбиркорлар, аграр секторда фаолият кўрсатаётган мутахассис ҳамда олимларнинг роли катта.
Сенаторларнинг фикрича, «Ўзбекистон Республикаси қишлоқ хўжалиги ходимлари кунини белгилаш тўғрисида»ги Ўзбекистон Республикаси қонунининг қабул қилиниши қишлоқ меҳнаткашлари жонбозлигининг, давлат мустақиллигини мустаҳкамлашга, мамлакат гуллаб-яшнашига улар қўшаётган ҳиссасининг эътироф этилишидир. Қонун сенаторлар томонидан маъқулланди.
Изоҳ (0)