Ўзбекистон ва Қозоғистон Бош прокуратуралари таълим ва тадқиқот соҳаларида ҳамкорлик қилади

Қозоғистон Бош прокуратурасининг таклифига биноан Ўзбекистон Бош прокуратураси ходимларидан иборат Ўзбекистон делегацияси хизмат ташрифи билан Остона шаҳрида бўлди. Бу ҳақда Ўзбекистон Бош прокуратураси маълум қилди.

Ташриф давомида Ўзбекистон Бош прокуратураси ходимлари ЕХҲТнинг Остонадаги дастурлари офиси ва АҚШнинг Қозоғистондаги элчихонаси кўмагида ўтказилган «Халқаро алоқалар билан боғлиқ бўлган молиявий жиноятларни тергов қилиш» мавзусидаги халқаро семинар-тренингда иштирок этди.

Семинар-тренингнинг мақсади трансмиллий молиявий жиноятларни тергов қилиш ва ноқонуний активларни қайтариш, минтақа давлатларида тўпланган тажрибани ўзаро алмашиш, юқори даражадаги зарур билим ва кўникмаларга эга бўлган кадрларни тайёрлаш соҳасида мутахассисларнинг малакасини ошириш бўлди.

Қозоғистон, Қирғизистон, Тожикистон ва Покистоннинг ҳуқуқни муҳофаза қилувчи органлари ходимлари ҳам беш кунлик тренинг тингловчилари бўлди.

Ташриф дастурига мувофиқ, Ўзбекистон Бош прокуратурасининг олий ўқув курслари ва Қозоғистон Бош прокуратураси ҳузуридаги Ҳуқуқни муҳофаза қилувчи органлар академияси ўртасида меморандумни имзолаш маросими бўлиб ўтди.

Меморандумда таълим, илмий-тадқиқот ва инновацион соҳалардаги ҳамкорликни амалга ошириш кўзда тутилган.

Бундан ташқари, Ўзбекистон делегацияси Қозоғистон прокуратура органлари тизимидаги ислоҳотларнинг бориши ва натижалари билан танишди.