Миллиардер Карл Айкан 18 август, жума куни АҚШ президенти Дональд Трампнинг иқтисодиёт ва бизнесдаги меъёр ҳамда қоидалар бўйича махсус маслаҳатчиси сифатида ўзини кўрмаслигини маълум қилди. Бу ҳақда «ТАСС» хабар бермоқда.
«Мазкур мактуб президентнинг махсус маслаҳатчиси сифатидаги фаолиятимни тўхтатишим ҳақидаги ўзаро суҳбатимиз мавзусини тасдиқлайди», — дейилади Айканнинг Трампга йўлланган мактубида.
Миллиардер хат нусхасини Twitter’даги саҳифасида жойлаштирди.
Карл Айкан 1961 йилдан бизнес билан шуғулланган ва ўшандан бери Texaco, Western Union, Viacom, Revlon, Time Warner, Motorola, Dell, Netflix, Apple ҳамда eBay каби йирик компанияларда раҳбарлик лавозимларида ишлаган, улушларга эга бўлган.
У ўтган йил декабрида Трампнинг иқтисодиёт ва бизнесдаги меъёр ҳамда қоидалар бўйича махсус маслаҳатчиси лавозимига танланганди.