Шавкат Мирзиёев Бутунжаҳон таэквондо федерацияси президентини қабул қилди

Ўзбекистон Президенти Шавкат Мирзиёев 10 август куни Бутунжаҳон таэквондо федерацияси президенти Чо Чунг Вонни қабул қилди. Бу ҳақда ЎзА хабар берди.

Давлат раҳбари меҳмонни қутлар экан, ушбу нуфузли халқаро спорт ташкилоти раҳбарига Ўзбекистонда таэквондони, аввало, ёшлар ўртасида оммалаштиришга қўшаётган шахсий ҳиссаси ва амалий саъй-ҳаракатлари учун самимий миннатдорлик билдирди.

Бугунги кунда ушбу жанговар санъат тури билан 20 мингдан ортиқ ўзбекистонлик шуғулланмоқда. 1993 йил Таэквондо миллий ассоциацияси ташкил этилди. Ўзбекистон давлат жисмоний тарбия институтида фаолият кўрсатаётган таэквондо кафедрасида малакали мураббийлар тайёрланмоқда.

Сўнгги йилларда ўзбекистонлик спортчилар йирик халқаро мусобақаларда муваффақиятли иштирок этиб, жаҳон ва қитъа чемпионатларида ғалаба қозонмоқда, Олимпия ўйинларида юқори ўринларни эгалламоқда.

Жорий йилнинг 11-13 август кунлари Тошкент шаҳрида мазкур халқаро ташкилот ташаббуси билан Бутунжаҳон таэквондо федерацияси президенти кубоги учун биринчи Осиё минтақаси мусобақаси бўлиб ўтади.

Таэквондони оммалаштириш, Ўзбекистон билан Жанубий Корея ўртасида шериклик муносабатларини ривожлантириш ва мустаҳкамлашга қўшган шахсий ҳиссаси эътирофи сифатида Чо Чунг Вон Тошкент шаҳрининг фахрий фуқароси ва Мирзо Улуғбек номидаги Ўзбекистон Миллий университетининг фахрий фан доктори унвонига сазовор бўлди.

Учрашувда ўзаро ҳамкорликни кенгайтириш, мамлакатда йирик халқаро турнирларни мунтазам ўтказиш, Бутунжаҳон федерациясининг давлат раҳбарининг ташаббуси билан Ўзбекистон Миллий университетида ташкил этилаётган таэквондо факультети фаолиятини йўлга қўйишда, шунингдек, ўзбекистонлик ёшларни спортга кенг жалб қилишга қаратилган бошқа тадбирларда иштирок этиш масалалари муҳокама этилди.

Чо Чунг Вон Шавкат Мирзиёевга самимий қабул ва Ўзбекистонда таэквондо ва бошқа спорт турларини ривожлантиришни қўллаб-қувватлаётгани учун чин дилдан миннатдорлик изҳор этди. Бутунжаҳон таэквондо федерацияси Ўзбекистон билан янги қўшма лойиҳалар ва кенг кўламли ҳамкорлик дастурларини амалга оширишдан манфаатдор эканини таъкидлади.