Оқ уйдан кейин: АҚШ собиқ президентлари қанақа уйларда яшайди? (фото)

Insider Pro нашри АҚШнинг Дональд Трампдан аввалги тўрт президенти Оқ уйни тарк этгач, яшаш учун қаерга кўчиб ўтгани ҳақида гапириб берди.

Барак Обама

Шу йилнинг январида Оқ уйдан кетгач, Барак Обама ва унинг оиласи Вашингтоннинг Калорама туманидан 6,3 миллион долларлик ҳовли-жойни ижарага олди. Обама оиласининг Чикагода уйи бор, аммо уларнинг кенжа қизи Саша мактабни тугатмагунича, улар Вашингтондаги 760 квадрат метр майдонли данғиллама ҳовлида яшайди.

Кичик Жорж Буш

2009 йилда президент лавозимини тарк этганидан сўнг, кичик Жорж Буш ўзи туғилиб-ўсган Техасга қайтди. Буш ва рафиқаси Лора Далласнинг Престон-Холлоу элита туманидаги машиналар юриши тақиқланган Дариа-лейс кўчасида жойлашган майдони 790 квадрат метрли ва тўрт ётоқхонали сипо уйга кўчиб ўтди. Бушлар оиласи, шунингдек, марказий Техасдаги Кроуфорд шаҳрида жойлашган ранчога ҳам эгалик қилади.

Билл Клинтон

Нью-Йорк штати, Уэстчестер округи, Чаппаква шаҳридаги 11 хонали ҳовли-жой эр-хотин Клинтонларнинг асосий қароргоҳи ҳисобланади. Улар бу уйни 1999 йилда, Билл Клинтоннинг президентлик муддати тугашига оз қолганида 1,7 миллион долларга сотиб олган эди. Яқинда Клинтонлар қўшни уйлардан бирини ҳам сотиб олди, уларнинг қизи Челси оиласи билан ота-онасини кўргани келган вақтда ўша ерда яшаб туради. Шунингдек, Билл ва Ҳилларининг Вашингтон ва Арканзасда ҳам уйлари бор.

Рональд Рейган

Оқ уйни тарк этгач, марҳум Рональд Рейган ва унинг рафиқаси Нэнси гоҳ Лос-Анжелеснинг Бель-Эйр туманида, гоҳ Санта-Барбарада яшади. Уларнинг асосан машҳурлар яшайдиган Бель-Эйрдаги уйи 670 квадрат метр майдонни эгаллаган бўлиб, Сейнт-Клауд-роуд, 668 манзилида жойлашган.