Apple’нинг шу йил чиқадиган 9 та янги қурилмаси (фотогалерея)

Apple жуда ёпиқ компания, у чиқарилиши режалаштирилаётган маҳсулотлари ҳақида деярли ҳеч қачон маълум қилмайди. Аммо маълумотлар тарқалиб кетиши олдини ҳам ололмайди, деб ёзади Insider Pro. Қуйида 2017 йил охиригача чиқиши кутилаётган 9 та гаджетни келтириб ўтамиз.

Siri «ақлли» колонкаси

Миш-мишларга кўра, компания Siri овозли ёрдамчиси бўлган смарт-динамикни ишлаб чиқмоқда. Баъзи маълумотларга қараганда, Apple колонкасига экран ўрнатилади, шунингдек, юзни таниб олиш функциясига эга бўлади. У июндаёқ Worldwide Developers Conference’да тақдим этилиши мумкин.

iPhone 8

Илк iPhone чиқарилганига ўн йил тўлди, шу туфайли смартфоннинг юбилей версиясидан мухлислар алоҳида нарсаларни кутмоқда.

У ромсиз экран, яхшиланган камера ва шиша орқа панелли бўлиши кутилмоқда. Apple ишлаб чиқаришда қийинчиликларга дуч келиши мумкин, шу сабабли iPhone 8 анъанавий тарзда сентябрда эмас, бир неча ой кечроқ чиқиши мумкин.

iPhone 7s ва 7s Plus

iPhone 7’нинг янгиланган версиялари iPhone 8 билан бир қаторда кузда чиқиши кутилмоқда, улар iPhone 8’дан анча арзонроқ бўлади.

Яхшиланган MacBook Pro

Янада кучли хусусиятларга эга яхшиланган версия июнда WWDC’да тақдим этилиши кутилмоқда

Қуввати оширилган MacBook

Apple WWDC’да янги MacBook чиқарилиши ҳақида эълон қилади — унда асосий эътибор унумдорликка эмас, автоном иш вақтига қаратилади.

Янгиланган MacBook Air

Ҳатто MacBook Air ҳам янгиланиши мумкин.

Янги iMac

Апрелда Apple профессионал фойдаланувчиларга мўлжалланган янги iMac 2017 йилда чиқишини эълон қилган эди.

Учинчи авлод Apple Watch

Кузда компания учинчи авлод Apple Watch’ни намойиш этади ва шу тариқа янгиланмаларнинг йиллик циклини ишга туширади.

4K’ни қўллаб-қувватловчи Apple ТV приставкаси

Миш-мишларга қараганда, Apple Ultra HD форматдаги видеоларни кўриш имконини берувчи Apple ТV приставкаси устида ишламоқда. У шу йил чиқарилиши мумкин.