Украина президенти «Одноклассники» ва «ВКонтакте»ни расман тарк этди

Украина президенти Пётр Порошенко Россиянинг «Одноклассники» ва «ВКонтакте» ижтимоий тармоқларидаги расмий саҳифаларини ёпишга қарор қилди. Бу ҳақда мамлакат раҳбари «ВКонтакте»даги саҳифаси орқали маълум қилди, деб хабар беради «Газета.ru».

Порошенконинг сўзларига қараганда, унинг жамоаси Россиянинг айрим ижтимоий тармоқларидан Москва томонидан олиб борилаётган гибрид урушга қаршилик кўрсатиш учун фойдаланиб келаётган эди.

«Аммо Россиянинг бутун дунё бўйлаб кенг миқёсли киберҳужумлари, шу жумладан, Франциядаги сайлов кампаниясига бўлган аралашув бошқачароқ, қатъийроқ ҳаракат қилиш пайти келганини кўрсатди», — деди у ва тилга олинган ижтимоий тармоқлардаги барча расмий аккаунтлар ёпилишини айтиб ўтди.

Бир муддат илгари Украинада «Яндекс», «Одноклассники» ва «ВКонтакте» ресурслари блоклангани хабар қилинган эди.