Malaysia Airlines Boeing ҳалокатида 3 фарзандидан ажралган австралиялик оила билан келишувга эришди

Malaysia Airlines авиакомпанияси Boeing самолётининг Украинадаги ҳалокати оқибатида яқинларини йўқотган австралиялик оила билан келишувга эришди. Бу ҳақда 2 май, сешанба куни авиаташувчи томонидан тарқатилган баёнотда маълум қилинди, деб ёзади «ТАСС».

«Дўстона ва махфий келишувга эришилди», — дея аниқлик киритади компания. «Қариндошларининг илтимосига кўра, келишув тафсилотлари ошкор этилмайди», — дея қўшимча қилади компания вакиллари. Хабарда бу қурбонлар қариндошлари билан биринчи келишув эканлиги таъкидланади.

Аввалроқ Энтони Маслин ва Мэрит Норрис ҳалокатда уч нафар фарзанди, шунингдек, Норриснинг отаси қурбон бўлганлиги учун товон тўлашни талаб қилиб авиакомпанияга қарши даъво киритган эди.

Амстердамдан Куала-Лумпурга учаётган Boeing 777 Malaysia Airlines йўловчи самолёти 2014 йилнинг 17 июлида Донецк вилоятининг шарқида ҳалокатга учраган эди. Самолётнинг 283 нафар йўловчиси ва 15 нафар экипаж аъзоси ҳалок бўлган.

Қурбон бўлганлар орасида Энтони Маслин ва Мэрит Норриснинг 8 ёшдан 12 ёшгача бўлган 3 фарзанди ва болаларнинг буваси ҳам бор эди. Энтони ва Мэрит 2016 йилда яна ота-она бўлди.

«Дарё»нинг Telegram’даги расмий канали — @toshqindaryo’га аъзо бўлинг!