Россиялик таниқли шоир Евгений Евтушенко АҚШда вафот этди. У 84 ёшда эди, дея хабар бермоқда «Коммерсантъ».
Евтушенконинг ўлими ҳақида унинг дўсти Михаил Моргулис (Беларуснинг Америкадаги фахрий консули, «Маънавий дипломатия» фонди раҳбари) маълум қилган.
Евгений Евтушенко 12 мартдан бери Оклахома штати Талса шаҳридаги клиникада даволанаётган эди, бироқ сўнгги кунларда унинг аҳволи кескин оғирлашган эди.
«У бир неча дақиқа аввал яқинлари ва қадрдонлари қуршовида вафот этди. Тинчгина, уйқусида, юрак тўхташидан», — дея шоирнинг беваси Мария Новикованинг сўзларидан иқтибос келтирмоқда «РИА Новости».
Евгений Евтушенко Россиянинг Иркутск вилоятида, геолог ва ҳаваскор шоир Александр Гангнус оиласида таваллуд топган. Унинг илк шеъри 1949 йили «Совецкий спорт» газетасида чоп этилган. 1952—1957 йилларда Горкий номидаги Адабиёт институтида ўқиган, бироқ кейинчалик четлатилган.
1952 йили Евгений Евтушенконинг «Келажак разведкачилари» номли илк шеърий тўплами нашрдан чиққан, ўша йили собиқ Иттифоқ Ёзувчилар уюшмасининг энг ёш аъзосига айланган. 1963 йили адабиёт бўйича Нобель мукофотига номзод сифатида кўрсатилган.
Евгений Евтушенко жаҳоннинг кўплаб тилларига таржима қилинган 150 дан ортиқ китоб муаллифидир. Шоир 2014 йили «маданиятни ривожлантириш, маданиятлараро мулоқот ва халқлар ўртасидаги муносабатларни мустаҳкамлашга қўшган улкан ҳиссаси» учун ЮНЕСКО медали ва дипломи билан тақдирланган эди.
«Дарё»нинг Telegram’даги расмий канали — @toshqindaryo’га аъзо бўлинг!
Изоҳ (0)