2017 йил 18 март куни Тошкент шаҳрида Ислом Каримов номидаги Республика хайрия жамоат фонди томонидан ташкил қилинган АҚШ ва Европа олий таълим муассасаларида 2017—2018-ўқув йилида магистратура босқичида таҳсил олиш учун грантлар саралаш конкурсининг якуний босқичи бўлиб ўтди. Бу ҳақда Ислом Каримов номидаги Республика хайрия жамоат фонди матбуот хизмати «Дарё»га маълум қилди.
Мазкур саралаш босқичида илк босқичда ўтказилган чет тили ва танланган мутахассислик бўйича имтиҳонларни муваффақиятли топширган талабалар қатнашди. Галдаги имтиҳон синовлари, чет эл олий ўқув юртларига қабул қилиниш учун зарур бўлган IELTS сертификатини олиш учун ўтказилди. Имтиҳон British Counsil минтақавий ваколатхонаси томонидан ўтказилди.
Саралаш конкурсининг якуний натижалари Фонднинг расмий сайтида (www.fondkarimov.uz) апрель ойининг якунида эълон қилинади.
Эслатиб ўтамиз, конкурс қуйидаги устувор йўналишлар бўйича ўтказилади: қайта тикланувчи энергия манбалари, кимё, сув ва ер ресурсларини бошқариш, машинасозлик технологиялари, озиқ-овқат технологиялари, озиқ-овқат хавфсизлиги, озиқ-овқат ишлаб чиқариш ва маркетинги, шаҳарсозлик, тарихий обидаларни муҳофаза этиш ва қайта тиклаш, маҳсулот дизайни, саноат ва меъморчилик дизайни ва рассомчилик.
Ислом Каримов жамоатчилик хайрия фондига Ўзбекистон мустақиллиги асосчиси ва Биринчи Президенти Ислом Каримовнинг хотираси ва ҳаётда амал қилган тамойилларини абадийлаштириш мақсадида 2016 йил асос солинган. Фонд истеъдодли ёшларга Ўзбекистон ва хорижий давлатларнинг энг илғор олий ўқув юртларида таълим олиши учун грантлар тақдим этади. «Дарё»нинг Telegram’даги расмий канали — @toshqindaryo’га аъзо бўлинг!
Изоҳ (0)