Россиялик ҳарбий хизматчига нисбатан Сурияда ҳарбий мулкни йўқотганлик ҳақида жиноий иш очилди

Шартнома бўйича хизмат қилувчи россиялик аскар Артём Хилькога қарши ҳарбий мулкни йўқотганлик тўғрисида жиноий иш қўзғатилди, деб ёзади Meduza.

Аскар Сурияда юкларга ҳамроҳлик қилган Тамань дивизияси таркибида хизмат қилган. Хилько тергов чоғида ўз айбини тан олди ва ишни алоҳида тартибда кўриб чиқишни сўради.

Ишни текшириш якунланиб бўлган, айни пайтда иш қайси судда кўрилиши аниқлаштирилмоқда.

Мол-мулкни йўқотиш ҳақидаги моддага кўра, шартнома бўйича ишлайдиган аскар икки йилгача озодликдан маҳрум этилиши мумкин.

«Коммерсантъ» ёзишича, Хильконинг иши — Суриядаги россиялик ҳарбий хизматчиларга қарши қўзғатилган ишларнинг «дастлабкиларидан бири». Аммо бунгача россиялик аскарларга нисбатан жиноий ишлар ҳақида расман хабар берилмаган.