Тошкент шаҳрида Ўзбекистон—Қирғизистон вазирликлараро сиёсий маслаҳатлашувларининг навбатдаги раунди бўлиб ўтди. Бу ҳақда Ўзбекистон ТИВ матбуот хизмати хабар берди.
Қирғизистон Республикаси делегациясига мамлакат ташқи ишлар вазири биринчи ўринбосари Динара Камолова бошчилик қилди.
Учрашувда сиёсий, савдо-иқтисодий, транспорт-коммуникация, маданий-гуманитар ва бошқа соҳалардаги долзарб масалалар ҳамда халқаро ва минтақавий муаммолар юзасидан фикр алмашилди.
Қайд этилганидек, ўтган йил 24 декабрда Самарқанд шаҳрида бўлиб ўтган олий даражадаги учрашув, чегарадош вилоятлар раҳбарлари, жамоатчилик вакиллари иштирокидаги икки томон ҳукумат делегацияларининг ўзаро ташрифлари, манфаатдор бизнес доиралар ўртасидаги алоқалар, давлатлараро чегараларни ҳуқуқий расмийлаштириш борасида давом этаётган музокаралар Ўзбекистон—Қирғизистон муносабатларининг янги динамикасини намоён этмоқда.
Ўзаро манфаатли бўлган барча соҳаларда алоқаларни ривожлантириш, жумладан, Ўзбекистон ва Қирғизистоннинг чегарадош ҳудудлари ўртасидаги ҳамкорликни янада чуқурлаштириш ва кенгайтиришдан томонлар манфаатдор эканлиги эътироф этилди.
Маслаҳатлашувлар доирасида консуллик масалалари ва ахборот соҳасида ҳамкорлик қилиш бўйича гуруҳларнинг учрашувлари ҳам ўтказилди.
Музокараларда Қирғизистоннинг Ўзбекистондаги Фавқулодда ва мухтор элчиси Дониёр Сидиқов иштирок этди.
Изоҳ (0)