8 мартга ўтар кечаси Фарғонадаги хонадондан 2600 доллар ва Gentra ўғирланди. Уч босқинчининг иккиси — қизлар

Фарғона шаҳрининг Навоий кўчасида жойлашган хонадонларнинг бирига 8 мартга ўтар кечаси номаълум уч киши бостириб кирган. Бу ҳақда Ўзбекистон Ички ишлар вазирлиги матбуот хизмати хабар бермоқда.

Жабрланувчининг маълум қилишича, босқинчилар темир жисм билан қуролланган бўлган. Улар хонадон эгасининг ҳаёти ва соғлиғи учун хавфли бўлган зўрлик ишлатиб, тан жароҳати етказган, 2 600 доллар ва Gentra автомашинасини эгаллаб, номаълум томонга қочган.

Воқеа жойига чиққан тезкор-тергов гуруҳи томонидан жиноят содир бўлган жойдан 9 дона бармоқ излари, узунлиги 120 см бўлган битта темир ва хонадонга ўрнатилган видеокамерадаги ёзувлар текшириш учун ашёвий далил тариқасида олинган.

Тезкор қидирув ҳаракатлари давомида жабрланувчига тегишли автомобиль шаҳарнинг Олтин куз кўчасида номаълум шахслар томонидан бошқариб кетилаётгани аниқланган ва милиция ходимлари томонидан ушланган. Гумонланувчиларнинг ёнидан жабрланувчига тегишли 900 доллар ашёвий далил тариқасида олинган.

«Мазкур босқинчилик жиноятини 1992 йилда ва 1993 йилда туғилган икки қиз ҳамда 1997 йилда туғилган йигит биргаликда, олдиндан жиноий тил бириктириб содир этгани аниқланди», — дейилади вазирлик ахборотида.

Ҳозирда мазкур ҳолат юзасидан Жиноят кодексининг 164-моддаси 3-қисми «в» банди билан жиноят иши қўзғатилиб, дастлабки тергов ҳаракатлари олиб борилмоқда.

«Дарё»нинг Telegram’даги расмий канали — @toshqindaryo’га аъзо бўлинг!