Жаҳоннинг 2016 йилдаги энг яхши футбол ҳаками Марк Клаттенбург фаолиятини Саудия Арабистонида давом эттиради

Англиялик ҳакам Марк Клаттенбург фаолиятини Саудия Арабистонида давом эттиради, деб ёзди «Sports.ru».

Клаттенбург Саудия Арабистони футбол федерациясида ҳакамлар қўмитасини бошқариб боради ҳамда уларнинг фаолиятини мувофиқлаштиради. Аввалроқ бу лавозимда ҳакамлик фаолиятини якунлаган бошқа бир инглиз Ҳовард Уэб ишлаб кўрганди.

Қайд этиш керак, Марк Клаттербург 2016 йил якунларига кўра дунёнинг энг яхши футбол ҳаками деб топилганди. Ўтган мавсумда у Европа Чемпионлар лигаси ва Европа чемпионати каби йирик мусобақаларнинг финал учрашувларини бошқариб борганди.

Клаттенбургнинг шартномаси қанчага мўлжаллангани ва у ўз ичига нималарни олишига ойдинлик киритилмаган.