БМТ Афғонистонда энг хавфли наркотиклардан бири кенг тарқалаётганидан огоҳлантирди

Дунёдаги энг хавфли синтетик гиёҳванд моддалардан бири саналган метамфетамин Афғонистонда наркотик истеъмол қилувчилар орасида кенг тарқалиб, мамлакат ҳудудида ҳам тайёрлана бошланди. Бу ҳақда «ТАСС» хабар бермоқда.

БМТнинг гиёҳванд моддалар ва жиноятчилик бўйича бошқармаси томонидан Афғонистондаги синтетик наркотик моддалар билан боғлиқ ҳолатларга бағишланган ҳисобот эълон қилинди.

Бошқарма мутахассислари саккиз ой давомида Кобул ва Жалолобод кўчаларида «ойна», «севги ёшлари», «шиша» деб аталувчи мазкур гиёҳванд модда ҳақида маълумот тўплади.

Бошқармада таъкидланишича, метамфетамин қорадори истеъмол қилувчилар орасида кенг тарқалиб бораётганлиги бўйича тахминларнинг етарлича асослари бор.

Метамфетамин тегишли органлар томонидан аҳоли орасида борган сари катта ҳажмларда топиб, тортиб олинмоқда. Шунингдек, мамлакатнинг ғарбий қисмида уни ишлаб чиқарувчи корхоналар ҳам мавжудлигини исботловчи далиллар борлиги бошқарма томонидан маълум қилинди.

Ҳисоботга кўра, метамфетамин истеъмол қилиш ҳолатларининг кўпчилиги Қундуз ва Нимрўз провинцияларида кузатилмоқда.

«Дарё»нинг Telegram’даги расмий канали — @toshqindaryo’га аъзо бўлинг!