Табиий макияж қоидалари

Табиий гўзаллик — охирги мавсум тренди. Косметика воситаларининг қалин қатлами камчиликларни яширса-да, барча аёлларни бир хил кўрсатиб қўяди.

Табиий макияж — бу енгил make up бўлиб, сизнинг афзалликларингизга урғу беради ва деярли сезилмайди. Табиий макияжни қандай ҳосил қилиш мумкин?

Асосийси, юз ранги тиниқ бўлиши лозим. Кўз остидаги қора айланаларни ва теридаги кичик камчиликларни корректор ёрдамида кўздан яширинг. Озгина BB крем суринг. Терига бир неча қават тонал воситаси суриш тавсия этилмайди.

Жигар ранг туш қорага қараганда кўпроқ табиий кўринади. Уни керагидан ортиқ суришнинг ҳам иложи йўқ. Кўзнинг ички бурчаклари ва пастки киприклар чизиғи остига сурилган ёруғликни қайтарувчи заррачаларга эга бадан рангидаги қалам қарашларингизга жозиба бағишлайди.

Қош ости, пешона, ёноқлар ва ияк соҳасига сурилган хайлайтер юзга соғлом ёрқинлик беради.

Лаб бўёғи рангини лабларингиз рангига яқин бўлганини танланг. Юзингизга озгина шаффоф пудра суринг — табиий макияж тайёр!

Ташқи кўринишингиз фақат ўзингизга хос эканлигини унутманг! Кимгадир ўхшаш учун қават-қават макияж суриш ярамайди. Табиий гўзалликка енгил урғу беришнинг ўзи кифоя!