Криштиану Роналду 4 карра «Олтин тўп» соҳибига айланди (видео)
Мадриднинг «Реал» жамоаси ҳужумчиси Криштиану Роналду France Football нашри томонидан йилнинг энг яхши футболчисига бериладиган «Олтин тўп» соҳибига айланди, деб хабар бермоқда «Чемпионат».
31 ёшли ҳужумчи 2015/16 йилги мавсумда «Реал» билан ЕЧЛ ғолиби, Португалия терма жамоаси билан эса Евро–2016 чемпиони бўлди. Бундан ташқари, ўтган мавсумда у 48 ўйинда майдонга тушиб, 51 та гол ва 17 та голли узатмага муаллифлик қилган.
«Чемпионат»нинг таъкидлашича, овоз бериш жараёнида бутун дунёдан 173 нафар ОАВ вакили иштирок этди. Унга кўра, Роналду 745 очко тўплади ва «Олтин тўп–2016» мукофотига лойиқ деб топилди. «Барселона» етакчиси Лионель Месси 316 очко билан иккинчи, «Атлетико» ҳужумчиси Антуан Гризманн 198 очко билан учинчи ўринни эгаллади.
«Олтин тўп–2016» совринига даъвогарлик қилган футболчиларнинг очколар бўйича рўйхати қуйидаги кўринишни олди.
1. Криштиану Роналду («Реал», Португалия термаси)2. Лионель Месси («Барселона», Аргентина термаси)3. Антуан Гризманн («Атлетико», Франция термаси)4. Луис Суарес («Барселона», Уругвай термаси)5. Неймар («Барселона», Бразилия термаси)6. Гарет Бэйл («Реал», Уэльс термаси)7. Рияд Маҳрез («Лестер Сити», Жазоир термаси)8. Жейми Варди («Лестер Сити», Англия термаси)9-10. Жанлуижи Буффон («Ювентус», Италия термаси) ва Пепе («Реал», Португалия термаси)11. Пьер-Эмерик Обамеянг («Боруссия» Дортмунд, Габон термаси)12. Руй Патрисиу («Спортинг», Португалия термаси)13. Златан Ибраҳимович («Манчестер Юнайтед», Швеция термаси)14–15. Поль Погба («МЮ», Франция термаси) ва Артуро Видаль («Бавария», Чили термаси)16. Роберт Левандовски («Бавария», Польша термаси)17–19. Тони Кроос («Реал», Германия термаси), Лука Модрич («Реал», Хорватия), Димитри Пайет («Вест Хем», Франция).
Португалиялик футболчи «Реал» Японияда давом этаётган клублар ўртасидаги жаҳон чемпионатида қатнашаётгани учун, 12 декабрь куни бўлиб ўтган «Олтин тўп–2016» тақдимот маросимида иштирок эта олмаслиги хабар қилинганди.
Роналдуга мукофот «Реал»га тегишли «Сантьяго Бернабеу» стадионининг музейида топширилгани боис, унинг «Олтин тўп–2016»ни қўлга киритиши олдинроқ маълум бўлганини тахмин қилиш мумкин.
2016 йилги «Олтин тўп» мукофотига даъвогарлик қилган яна 11 номзод — Уго Льорис («Тоттенҳэм», Франция термаси), Серхио Рамос («Реал», Испания термаси), Кевин Де Брюйне («Манчестер Сити», Бельгия термаси), Пауло Дибала («Ювентус», Аргентина термаси), Диего Годин («Атлетико», Уругвай термаси), Андрес Иньеста («Барселона», Испания термаси), Коке («Атлетико», Испания термаси), Гонсало Игуаин («Ювентус», Аргентина термаси), Томас Мюллер («Бавария», Германия термаси), Мануэль Нойер («Бавария», Германия термаси) ва Серхио Агуэрога («Манчестер Сити», Аргентина термаси) ҳеч қайси бир журналист овоз бермади.
Қайд этиш жоиз, Криштиану Роналду фаолияти давомида тўртинчи марта «Олтин тўп» соҳибига айланди. Бунга қадар у 2008, 2013 ва 2014 йилларда ушбу мукофотга лойиқ деб топилганди.
«Олтин тўп» совринини қўлга киритиш бўйича «Барселона»нинг аргентиналик ҳужумчиси Лионель Месси ҳамон етакчилик қилмоқда. 29 ёшли футболчи 2009, 2010, 2011, 2012 ва 2015 йилларда, жами 5 марта «Олтин тўп»ни қўлга киритган.
[playbuzz-item playbuzz_url="https://www.playbuzz.com/muhrima10/messi-va-ronaldu-erasiga-qaysi-futbolchi-yakun-yasab-beradi"]
Диққат, диққат! «Дарё»нинг Telegram’даги расмий канали — «Toshqin ‘Daryo’»га обуна бўлиб, янгиликлардан овозли кўринишда баҳраманд бўлишингиз мумкин.
