Исроил ҳарбий-ҳаво кучлари Голан тепаликларининг жанубий қисмида, Сурия билан чегарада аскарларга қарата ўт очган жангарилар гуруҳини йўқ қилди. Жами тўрт жангари ўлдирилди. Бу ҳақда Исроил мудофаа армияси матбуот хизмати махсус коммюнике чиқарди, деб хабар беради «ТАСС».

«Жангарилар Голан тепаликларининг жанубий қисмида ўт очиб, гранатомётлардан Исроил мудофаа армияси бўлинмасини ўққа тутди, армия ҳужумга жавоб берди ва таҳликани бартараф этди», — дейилади ҳужжатда.

Haaretz газетасига кўра, ҳужумни «Шуҳадо ал-Ярмуқ» гуруҳи амалга оширган. Ушбу гуруҳ ИШИД билан ҳамкорлик қилади.

Ҳужумда исроиллик ҳарбийлардан ҳеч бирига зиён етмади.

ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан «террорчилик ташкилоти» деб топилган.