Бразилиянинг 18 та ҳудудида 25 ноябрь, жума куни давлат харажатларини чеклаш ташаббусига қарши бўлганларнинг намойишлари бўлиб ўтди. Бутун мамлакат бўйлаб намойишларда бир неча минг киши иштирок этди. Бу ҳақда Globo телеканали маълум қилди, деб ёзади «ТАСС».

Касаба уюшмалари ва жамоатчилик ташкилотлари томонидан ташкил этилган намойишлар Жанубий Америкадаги республиканинг аксарият штатларида тинч ўтди.

Бразилия жанубида жойлашган Порту-Алегри шаҳридаги норозилик намойишлари бундан истисно бўлди. У ерда намойиш иштирокчилари ва полиция ўртасида тўқнашувлар юз берди. Телеканалнинг маълум қилишича, бир неча ниқобдаги намойишчилар тартиб қўриқчиларига «Молотов коктейл»ларини улоқтирган. Полициячилар, ўз навбатида, намойишчиларга қарши кўзни ёшлатувчи газни қўллаган.

Октябрь охирида Бразилия парламентининг қуйи палатаси мамлакат президенти Мишел Темер томонидан таклиф этилган давлат харажатларини чеклаш ҳақидаги конституциявий ўзгартиришни қўллаб-қувватлаган эди.

Диққат, диққат! «Дарё»нинг Telegram’даги расмий канали — «Toshqin ‘Daryo’»га обуна бўлиб, янгиликлардан овозли кўринишда баҳраманд бўлишингиз мумкин.