Россиянинг Санкт-Петербург шаҳри полицияси 100 ёшли нафақахўрга банк ҳисобидан ўғирлаб кетилган 2,5 миллион рубль миқдоридаги жамғармаларини қайтариб берди. Қаллоблик схемасида адвокат бўлиб ишлаётган собиқ полициячи, банк ходимаси ва суд нозирлари иштирок этган эди, деб хабар беради TJournal.
Бешта орден соҳиби бўлмиш фахрий Константин Земсковнинг пуллари 2015 йили ўғирланган эди. Йил охирида у банкка келиб, бир қисм пулларини нақдлаштирмоқчи бўлган эди. У ерда кекса инсонга ҳисобида пул йўқлиги, барча маблағлар суд қарорига кўра ечиб олингани хабар қилинди.
Нафақахўр полицияга ариза ёзди, аммо у ҳам 2016 йил ёзига қадар участка нозирининг хонасида чанг босиб ётди. Шундан сўнг шикоят туман прокурорига етиб борди. Прокурор ушбу шикоят ҳақида раҳбарият иштирокида ўтган йиғилишлардан бирида айтиб ўтди. Олий мартабали полициячилар қаллобликни дарҳол фош этишга кўрсатма берди.
2016 йилнинг 20 сентябрь куни Виборг туман ИИБ тергов бошқармаси иш қўзғатди.
Терговнинг аниқлашича, 2015 йил 5 июлда фахрийдан 2,527 миллион рубль жарима олиш тўғрисида ижро қоғози чиқарилган. Бу — нуронийнинг ҳисобида бор пулларнинг аниқ рақамидир.
Суд ижрочилари ахборотни текшириб ўтирмай, кўрсатилган суммани даъвогар фойдасига Земсковнинг ҳисобидан ечиб олган. Аммо пулни даъвогар эмас, бошқа одам ишончнома асосида олиши лозим эди. Охир-оқибат маблағни маҳаллий юридик фирма ходимаси ҳисобдан ечиб олган.
Воситачилар силсиласи орқали терговчилар бош фирибгарга чиқа олди. У илгари полицияда ишлаган петербурглик адвокат Дмитрий Карапац бўлиб чиқди.
23 ноябрь куни Карапацнинг қўлга олиниши асносида суд ижрочилари ҳам тинтув қилинди. Текширувсиз пулни ечиб олган ходимлар сўроқдан ўтказилди.
Адвокат уйининг олдида қўлга олинди. Полициячиларни кўрган Карапац қочишга уринди ва ҳатто телефонини синдирди, аммо барибир қўлга олинди, унинг телефонидан эса тергов учун фойдали маълумотлар топилди.
Карапац берган кўрсатмалар асосида аниқлаштирилишича, 2015 йил ёзида у интернетда 2009 йил ижро қоғози намунасини топиб, шу асосда сохта ҳужжат тайёрлаган. Нафақахўрнинг ҳисобидаги пуллар ҳақидаги маълумотни қаллобга маҳаллий банк ходимаси берган. Пулни эса ҳисобдан адвокатнинг таниши, юридик фирмада ишлайдиган аёл ечиб олган. Карапац нафақахўр оламдан ўтган деб ўйлаб, унинг пулларига эга чиқмоқчи бўлганини эътироф этмоқда.
25 ноябрь куни жабрланувчи Карапац билан учрашди. Қаллоб адвокат фахрийдан узр сўради.
Терговчилар, шунингдек, Карапац камида яна битта йирик қаллобликка алоқадорлигини аниқлади.
Изоҳ (0)