Футбол. Германия терма жамоаси Италияга гол ура олмади, Англия эса Испанияга 2 та гол уриб ҳам ютмади (видео)

15 ноябрь куни якунига етиши керак бўлган ФИФА кунларидан унумли фойдаланган Европа мамлакатлари халқаро ўртоқлик ўйинлари доирасида майдонга тушди. Тўрт кун аввал улар Россия—2018 доирасида саралашнинг 4-турини якунлаганди.

Италия терма жамоасига қарши ўйин олдидан Рим Папасининг қўлини сиқиб қўйган немис футболчилари, эртаси куни 90 дақиқа давомида рақиб дарвозасига йўл топа олмади. Шунингдек, ўз дарвозасидан ҳам гол ўтказиб юбормади.

Кечаги куннинг энг қизиқарли ўйини Англия ва Испания терма жамоалари ўртасида бўлиб ўтди. Беллашувда инглизлар иккита гол фарқи билан олдинда бора туриб, якунда ғалабани қўлдан чиқарди. 89 ва 96-дақиқаларда гол ура олган испанлар мағлубиятдан қутулиб қолди.

Евро—2016 финалига қадар етиб борган Дидье Дешам бошқарувидаги Франция терма жамоаси ўз майдонида Кот-д’Ивуар қаршилигини синдира олмади. Европанинг қолган жамоалари қайд этган натижалар билан қуйида танишиб олиш мумкин.

Халқаро ўртоқлик ўйинлари 15 ноябрь, сешанба

Малта — Исландия 0:2

Венгрия — Швеция 0:2

Украина — Сербия 2:0

Чехия — Дания 1:1

Шимолий Ирландия — Хорватия 0:3

Австрия — Словакия 0:0

Италия — Германия 0:0

Франция — Кот-д’Ивуар 0:0

Англия — Испания 2:2