«Ўзнефтмаҳсулот» АК: Тошкент шаҳрида бензин тақчиллиги ҳақидаги шов-шувлар асоссиз

Сўнгги кунларда Тошкентдаги айрим автомобилларга ёнилғи қуйиш шохобчаларида автобензинга навбатлар кузатилмоқда. Бундай вазият мижозларнинг ҳақли эътирозларига сабаб бўлмоқда. «Ўзнефтмаҳсулот» акциядорлик компанияси мазкур ҳолат юзасидан ўз муносабатини билдирди. 

Компания мутасаддиларига кўра, бензин тақчиллиги билан боғлиқ нохуш кўринишлар «Ўзнефтмаҳсулот» АКга боғлиқ бўлмаган қуйидаги омиллар натижасида юзага келмоқда:

«Вилоятлардан қатнаётган кўпчилик автомобиллар эгалари чайқовчилик ниятида турли йўллар билан керагидан ортиқча миқдорда автобензин олиб чиқиб кетишмоқда. Бундай ҳолатнинг олдини олиш мақсадида компания томонидан «Ўздавнефтгазинспекция» ва тегишли ҳуқуқни муҳофаза қилиш органлари билан бирга профилактика чора-тадбирлари амалга оширилмоқда. 

Айрим шов-шув ишқибозлари томонидан аҳоли орасида «бундан кейин АЁҚШларда автобензин камайиб кетар экан», деган умуман ўринсиз хабарлар тарқатилмоқда. Бу хусусда «Ўзнефтмаҳсулот» акциядорлик компанияси шуни ишонтириб баён қиладики, юртимиздаги нефтни қайта ишлаш заводлари ёнилғи маҳсулотларини етарли ишлаб чиқармоқда ва бундан буён АЁҚШларга нафақат белгиланган миқдорда, балки унга қўшимча миқдорда ҳам автобензин етказиб бериш режалаштирилмоқда. 

Юқорида баён этилган шов-шувларга учган автомобиль эгалари автобензинни керагидан ортиқда харид қилиб, ғамлаб олишга ҳаракат қилишмоқда. Хусусан, айрим автомобиль эгалари ўз уйлари ёки гаражларида автобензинни захира қилиб қўйишга киришишган. Кези келганда шуни алоҳида қайд этиш керакки, хавфли ёнилғи маҳсулотларининг махсус мослаштирилмаган жойларда сақланиши кўнгилсиз воқеаларга олиб келиши мумкин.

Статистик маълумотлардан кўриниб турганидек, бунга автомобиллар сонининг йилдан йилга кўпайиб бораётганлиги ҳам муҳим омиллардан бири бўлиб хизмат қилмоқдаки, мазкур ҳолат, ўз навбатида, автобензин истеъмолининг борган сайин ортиб боришига олиб келмоқда. Бироқ компания томонидан автобензин ишлаб чиқариш кўрсаткичларини белгилашда бу омил ҳам назарда тутилмоқда».

«Ўзнефтмаҳсулот» акциядорлик компанияси мазкур вазиятни барқарорлаштириш учун нефтни қайта ишлаш заводларида автобензин ишлаб чиқариш миқдорини мумкин қадар кўпайтириш, шу жумладан, четдан қўшимча миқдорда углеводород хом ашёсини келтириш ва истеъмолчиларни автобензин билан тегишли миқдорда таъминлаш юзасидан барча зарур чораларни кўраётганлигини маълум қилди.