Швейцариялик журналист Франсуа Пиле 2016 йил апрелида диктаторларнинг ҳаракатларини кузатиб борувчи ботни ўйлаб топган эди. GVA Dictator Alert дастури амалдаги тузуми авторитар деб топилган давлатларнинг етакчиларига тегишли самолётларнинг ҳаракатини кузатиб боради ва ҳар сафар шундай самолёт Женевага қўнганида, бу ҳақда Twitter’да ёзув қолдиради. Ҳозиргача Dictator Alert 60 та шундай ташриф ҳақида ахборот берган. Октябрь ойида бот кузатувидаги авторитар етакчилар рўйхатига Владимир Путин ҳам қўшилди, дея хабар бермоқда Meduza.
Франсуа Пиленинг боти бир соатда бир марта Женева аэропорти яқинидаги антенналарга сўров юбориб, самолёт транспондерларидан сигнал қабул қилади. Дастурни ишлаб чиқишда Пилега ўз вақтида Google’да муҳандис сифатида ишлашга улгурган қариндош акаси Жюльен ёрдам берган. Дастур ҳозирча хусусий самолётларнинг сигналларини қабул қила олмайди.
Пиленинг рўйхатида Озарбайжон, Баҳрайн, Қатар ва бошқа шу каби мамлакатларнинг ҳукуматларига тегишли 80 самолёт бор. 8 октябрь куни — Владимир Путин 64 ёшга тўлганидан бир кун ўтиб, рўйхатга Россия ҳам қўшилди.
btw, we just added 27 new dictator's planes from Algeria, Kuwait, Jordan, Gabon, Angola, Ivory Coast and Russia. Welcome to the list Vlad! pic.twitter.com/K2L9VAZovv
— GVA Dictator Alert (@GVA_Watcher) October 8, 2016
Франсуа Пиленинг тан олишича, кўплаб авторитар етакчиларнинг Женевага парвоз қилиш учун қонуний асослари бўлиши мумкин, чунки бу ерда БМТ ва бошқа халқаро ташкилотларнинг бинолари жойлашган. Бироқ бундай парвозлар ноқонуний даромадларни легаллаштириш билан боғлиқ бўлиши мумкинлигини ҳам истисно қилиб бўлмайди.
Келажакда Пиле дастур фаолиятини Европанинг бошқа аэропортларига ҳам ёйишга, шунингдек, хусусий самолётлар ва яхталарнинг ҳаракатланиши ҳақидаги ахборотни тўплашни ўрганишга умид қилмоқда.
«Ҳар сафар қандайдир Экваториал Гвинеядан самолёт учиб келганида, биз ўзимиздан сўрашимиз керак: у бу ерда нима қиляпти? У дипломатик ишлар бўйича келганми ёки халқдан ўғирланган пулларни яшириш учун?», — дея Пиленинг сўзларидан иқтибос келтиради The Verge нашри.
Диққат, диққат! «Дарё»нинг Telegram’даги расмий канали — «Toshqin ‘Daryo’»га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)